அய்யனார் கம்மாவின் கரைமேல்.. நர்சிம்

இந்த மாதம் இரண்டாவது வாரத்தில் கேகே நகர் 'புக் பேலஸி'ல் நடக்கவிருக்கும் 'அகநாழிகை' பதிப்பக புத்தகவெளியீட்டு விழாவில் 7 புதிய புத்தகங்கள் வெளியாகவிருக்கின்றன. பதிவர்கள் புடைசூழ விழா ஒரு கோலாகலமான பதிவர் சந்திப்பாகவும் மலரும் என நம்புகிறோம். அனைவரையும் அகநாழிகையின் சார்பில் வரவேற்கிறோம். விழாவில் வெளியாகவிருக்கும் புத்தகங்களில் ஒன்று நண்பர் நர்சிம்மின் 'அய்யனார் கம்மா' சிறுகதைகள் தொகுப்பு.

நேற்று புத்தகம் பிரிண்டில் இருந்து வந்த சூடு ஆறுமுன்பே புத்தகத்தைக் காணும் ஆவலில் போன்கால்கள் பறக்க திடுமென ஏற்பாடாகியது ஒரு பதிவர் சந்திப்பு. நான்கு பேர் ஐந்து பேர் ஆறு பேர் என எண்ணிக்கொண்டே போக கடைசியில் நிகழ்ந்தது அந்த பிரம்மாண்டமான பதிவர் சந்திப்பு தி.நகர் அருணா உணவு விடுதியில். பைத்தியக்காரன், பொன்.வாசுதேவன், சுகுணாதிவாகர், லக்கிலுக், அதிஷா, கேபிள்சங்கர், தண்டோரா, டாக்டர் புரூனோ, யாத்ரா, ச.முத்துவேல், எம்.எம்.அப்துல்லா, கார்க்கி, வெண்பூ, முரளிகண்ணன், காவேரிகணேஷ், அதிபிரதாபன், சூர்யா (யாரையாவது விட்டுட்டேனா? ஹிஹி) ஆகியோர் கலந்துகொள்ள பிரம்மாண்ட விருந்துடன் நிகழ்வு நடந்தேறியது.

பிறந்தநாள் கேக்கை வெட்டும் நிகழ்ச்சியைப்போல புத்தகக்கட்டை யார் பிரிக்கப்போகிறார்கள் என்ற ஆவலில் விழாநாயகன் நர்சிம்மை பார்த்தபோது அவர் எங்களுக்கு உணவளித்த விடுதி சிப்பந்தியை பிரிக்கச்சொல்லி நெகிழச்செய்தார். அந்த இனிய கார்த்திகைத்திருநாளில் புத்தகத்தின் பிரதிகளை சுகுணாதிவாகர், தண்டோரா ஆகியோரைத்தொடர்ந்து அனைவரும் பெற்றோம். மிக அழகான அட்டைப்படத்துடன், நர்சிம்மின் 13 கதைகளுடன் புத்தகம் மிளிர்ந்தது (கதைகள் குறித்த விமர்சனப்பதிவு பின்னர்).

பின்னர் அவரவர் விருப்பங்களில் அவரவர் பாய்ந்தோம். பைத்தியக்காரன் புத்தகத்தை புத்தகத்தை ஆவலோடு பார்த்துக்கொண்டிருக்க, கேபிள்சங்கரும், அண்ணன் தண்டோராவும் பூஸ்ட் பானத்தை ஆவலோடு பார்த்துக்கொண்டிருக்க, நானும், வெண்பூவும் உணவு வகைகளை ஆவலோடு பார்த்துக்கொண்டிருக்கவென.. நிகழ்வு துவங்கியது. ஏற்கனவே நண்பர்களாக இருந்த ஓர் இளம் கவிஞர் கூட்டமே சமீபத்தில் வெற்றிகரமான திரைப்பட பாடலாசிரியர்களாக களம் கண்டதைப்போல பதிவுலகத்திலிருந்து ஒரு புதிய எழுத்தாளர் கூட்டம் வெளிவரவேண்டும் என்றொரு எண்ணம், ஆசை உண்டு எனக்கு. இந்த நிகழ்வைப்பார்த்த போது அந்த நம்பிக்கை அதிகரித்தது. கலகலப்பு, உற்சாகம், சிரிப்பு என சந்திப்பு சுமார் 11 மணிக்கு நிறைவடைந்தது.

முதல் புத்தகத்தை கண்ட மகிழ்வில் ஒரு குழந்தையின் குதூகலத்தோடு இருந்தார் நர்சிம். அவருக்கும் நம் அனைவரின் சார்பாகவும் இன்னும் உயரங்கள் பல தொட எனது நல்வாழ்த்துகளை இங்கே பதிகிறேன்.

கலந்துகொண்ட அனைவரின் சார்பாகவும் சுகுணாதிவாகர் நர்சிம்முக்கு ஓர் அன்புப்பரிசை வழங்கினார். அது..

.