காலனைக் கேலி செய்தவள்

'தேவதை' நடப்பு இதழில் நமது அன்புக்குரிய தோழி, பதிவர் ரம்யாதேவியைப் பற்றிய கவர் ஸ்டோரி வெளியாகியுள்ளது. காலனைக் கேலி செய்து மரணத்தை வென்று வந்த அவரது வாழ்க்கை அனைவருக்கும் தன்னம்பிக்கை தரும் ஒரு லைவ் எடுத்துக்காட்டு. ரம்யா மிகுந்த அன்பானவர், பழக இனிமையானவர். அவருடன் போனில் பேச நேர்ந்தால் கலகலவென சிரிக்காமல் நாம் போனை வைத்துவிட முடியாது. நகைப்பு ததும்பும் அவர் பேச்சு கட்டுரையிலும் தெறித்தது. சிறிதும் சிம்பதி கிரியேட் செய்துவிடாமல் பிரமிப்பைத் தருவதாக இருந்தது கட்டுரை. நீங்கள் ஒரு உதாரண மனுஷி ரம்யா. உங்கள் நட்புக்கு நாங்கள் பெருமை கொள்கிறோம், வாழ்த்துகள்.!

************

பிரபல பதிவர் ராமலக்ஷ்மியின் வலைப்பூ குறித்த அறிமுகத்துடன் அவரது புகைப்படங்கள் குறித்த சிலாகிப்புடன் நடுப்பக்கங்கள் நிறைந்திருந்தன (எங்கூர்க்காரங்கன்னாலே எல்லாத்திலும் திறமைசாலிகள்தான்னு தனியா வேற சொல்லணுமா என்ன? ஹிஹி). அவருக்கும் இன்னும் உயரங்கள் பல தொட வாழ்த்துகள். அப்படியே அதே இதழை சுவாரசியமாக புரட்டிக்கொண்டு வந்தபோது வீட்டுக்குறிப்புகள் பக்கம் தென்பட்டது (ஹைய்யா.. நம்ப செட்டு என ச்சின்னப்பையனும், மகேஷும் கூச்சலிடுவது கேட்கிறது). ஒரு அழகிய குறிப்பு மிகவும் பிடித்திருந்தது.

"டிஸைனர் ரப்பர்கள், பென்சில்கள், ஊதல், பென்சில் பாக்ஸ் போன்ற சிறிய பொருட்களை எப்போதும் கைவசம் வைத்திருங்கள். குழந்தைகளை சந்திக்க நேர்கையில் அவற்றை பரிசளித்து அந்த சின்னஞ்சிறிய மனிதர்களின் கண்கள் வியப்பிலும், மகிழ்ச்சியிலும் விரிவதைக்காணலாம்."

ஐடியாவும் 'சின்னஞ்சிறிய மனிதர்கள்' என்ற வார்த்தைப்பிரயோகமும் எனக்கு மிகவும் பிடித்திருந்தது.

*************

PIT குழுவாக இயங்கும் ஒரு பெரிய புகைப்படப்போட்டிக்கு அழைத்திருக்கிறார்கள். தலைப்பு 'என் நகரம்'. எனக்குள் உறங்கிக்கிடந்த புகைப்படக் கலைஞனை சுரண்டி விட்டுவிட்டார்கள். திருநெல்வேலியை படங்களாக பிரதிபலிக்க முடிவுசெய்துள்ளேன். பிப்ரவரி வரை நேரமிருப்பதாலும், ஜனவரியில் நீள்விடுப்பில் ஊர் செல்ல இருப்பதாலும் முடியும் என நம்புகிறேன். என்னுடன் இணைந்துகொள்ள விருப்பமிருப்பவர்கள் மெயிலில் தொடர்பு கொள்ளவும். thaamiraa@gmail.com (டெஸ்ட் வைத்து சேர்த்துக் கொள்ளப்படுவார்கள். ஹிஹி..)

**************

வேட்டைக்காரன் விளம்பரங்கள் நல்ல டெம்போ ஏற்றுவதாக உள்ளன. படம் விஜயின் ரசிகர்ளை ஏமாற்றாமல் இருக்கக்கடவதாக. கார்க்கியைப் போலவே நானும் பயங்கர எதிர்பார்ப்பில் இருக்கிறேன். பின்னே குருவி மாதிரி ஒரு ஹிட் விமர்சனம் எழுதி எவ்வளவு நாட்கள் ஆகின்றன? எனது ஆவலை தூண்டியிருக்கும் இன்னொரு படம் ஜேம்ஸ் கேமரூனின் 'அவதார்' (ஆங்கிலத்தில் என்ன 'ஏவேட்டர்'னு சொல்லணுமா?). மேக்கிங் விடியோவை யூடியூபில் பார்த்த போதே பிரமிப்பு தாங்கவில்லை. விஷுவலின் உச்சத்தை தொட்டிருப்பார்கள் என நினைக்கிறேன். பார்ப்போம்.

**************

வண்ணம் (கவிதை)

சில புத்தகங்கள்

கொஞ்சம் ரசனை

சிறிது வண்ணங்கள்

தந்தது நீ

வாழ்வதற்கான முதல் தேவையைத் தந்த

உன்னை விட்டுவிட்டும்

வாழ்ந்துகொண்டுதான் இருக்கிறேன்

.